..... حكاية السنين .....
أشوف في حضن الغلابة طيبتك
أنام وأصحي ألقاني في حضنك
وأسألك حبيبتي إنتي مين
أنا حلمك في نور النهار
وحلمك ف قلوب السهرانين
أنا إللي كنت ف زمن هواك
أمل يروي عطش المجروحين
أنا إللي كنت في حزنك رضاك
إيد تطبطب وبوسة عالجبين
أنا حكاية سنين عاشت معاك
فراق وجرح وشوق وحنين
أنا كل ضحكة تشوفها عيونك
ما تعرف صاحبها يبقي مين
أنا كل حلم صاحب زمانك
حكاية حب تسألها إنتي فين
أنا بإختصار إنت في طيبتك
طفولتك إللي ما فارقت سنين
أنا ساعة صفاك بأبقي جنبك
كلمة ياباسط تعدي الليل الحزين
أنا كل حكاية حب عدت عليك
سافرت بلا وداع أو حتي أنين
أنا حبة دفا تملكها في عز الشتا
تفتح قميصك لقلوب البردانين
أنا من يوم ميلادك للحظة مماتك
بأكتب حكايتك كأني جنبك قرين
أنا إسمك لما تحلي حروف الأسامي
وتكتب غنوة يحفظها كل العاشقين
أنا لآخر زمانك هفضل حبيبتك
ويفضل سؤالك حبيبتي تبقي مين؟
...... أيمن بلال ......
ليست هناك تعليقات:
إرسال تعليق