يخليكي يا شده🍃
الله يخليكي يا شده
يلي ظهرتي الاحبه
مين ميل ومسح دمعه
ومين مال وفارق سكه
شدي كمان حبتين
وأقسي علي الجدعان
بيني مين السند
و مين مل وقال سلام
لملم ضحكته
وكمان دمعته
وقال أعذرني يا صاحبي
ما بتحمل أشوف
كسرتك
بدل ما يكون عكاز
يسند وقعتي
كان خيبان وكمل علي كسرتي
أقوي يا شده كمان
لجل تغربلى الخيبان
يسقط من الغربال
كل خسيس وجبان
أصله في دنيا الرجال
تايه ما له مكان
لو حبيت تتمنه
هتطلع أنت الخسران
كومت علي كوم قش
مع اول ريح كش
طار أتبعتر
اصله عديم ألاصل
والله ما زعلان من الشده
زعلان علي اللى خته عزوه
وقلت بكرة يكون
جنبي في شدتي
أتاري هو نفسه
بيتمني كسرتي
بنعيب عليك يا زمن
وأحنا كلنا خذلان
لا غدرت بيوسف
ورميته بجُب زمان
ولا أتهمته بهتان
العيب في نفوس مريضه
ما بتصفي
مليانه سواد
تكرة الفالح
وتهد في البنيان
تسلميلي يا شده
بينتي الخسيس
والجبان
واللى بمليون وش
يتلون مع الكسبان
ويفارقك لغيرك
يدور علي المليان
يخليكي يا شده كمان وكمان
رحمتيني من تعالب
بوشوش غزلان
🌼منى محمد رزق
ليست هناك تعليقات:
إرسال تعليق