& أسألي & بقلم الشاعر : جمعه الجر

 ... أسالى...

لو كنتى محتاره أسالى..

راح تعرفى إيه الخبر...

أسالى كل البشر..

أسالى حتى الشجر...

أسالى نور الشوارع..

أسالى ضى القمر...

يقولوا عاشق وانكتب..

على قلبه يوم مر السهر...

لو تسألى راح تعرفى..

أنا قلبى مايهمه الخطر..

طول عمرى فارس والقلم..

سيفى فى ايدى ماانكسر...

دلوقتى بستنى الكلام..

من بين شفايفك وانتظر...

زى الورد تتمنى الندى..

والزرع يستنى المطر...

طول عمرى عاشق للجمال..

قلبى رحال يهوى السفر...

واعشق مجالس السمر...

لو ليلى عود قلبى الوتر...

ولا عمرى كنت فى يوم أسير..

ولا بنحنى ولا بعتذر...

دلوقتى بطلب يوم لوقا..

آه منه دوار القدر...

لو لسه محتاره أسالى..

أنا قلبى غير كل البشر...

أنا قلبى دايم فى حنانه..

عمره فى مشاعره ماكان حجر...

واللى بينى وبين عنيكى..

خلاف فى وجهات النظر...

لو كان غدر لوكان هجر..

كان قدر ادام عنيكى ياخد الحذر...

           جمعه الجر