♧زجل♧
♤المَهْرازْ♤
دَڭْ دَڭْ يــــــا مَــــــهْرازْ الأَيَّامْ
دَڭََّــــــة تْــــــنَيَّلْ زَرِّيعَةْ العْمَرْ
ؤُتْــــــڭادْ حَـــرْ الْـحالْ الْمايَلْ
الْكــــــاسْ فــاضْ فْ الْخاطَرْ
دَڭْ دڭْ يــــــا مَــــــهْرازْ الْأيَّامْ
دَقَّــــــة فْ الــــــرَّاسْ تْـــفَيَّقْ
وْدَقَّــــة عَـكْـلَتْ رْجَلْ الجَّرْيَة
وَشْــــحالْ تْهَزْ النَّفْسْ الْحارَّة
دَڭْ دَڭْ يــــــا مَــــــهْرازْ الأيَّامْ
مــــــَنْ دَڭَّــاتْ الحَنَّانَة رْوايَحْ
عــــــَطْرِيَّة تْـهَزْ الرُّوحْ تَعْشاقْ
غــــــَرْبْلاتْها يْـدِّينْ أَعَزْ النَّاسْ
دَڭْ دَڭْ يــــــا مَــــــهْرازْ الأيَّامْ
مـــَنَّكْ وَحْشاتْ الْدَڭَّاڭْ الْمِّيمَة
حـــــْداڭْتْها ليقامَة تْفوحْ هَمَّة
الله يَــــــرْحَمْ أيَّـــامَكْ الْمِّيمَة
دَڭْ دَڭْ يــــــا مَــــــهْرازْ الأيَّامْ
دَڭَّــــــة وْرَى دَڭَّـــــة دَڭْدْڭاتْ
الخاطَرْ المْوَعَّتْ حَــرْ الحَڭْرَة
الــــــجَّايَة مَنْ القْريبْ بَالْمْكَرْ
دَڭْ دَڭْ يــــــا مَـــــهْرازْ الأيَّامْ
مــــــا ضَــــرْني غيرْ لِّي فاتْ
تْــــــكالْ الــــعْمَرْ وْتَلاَّ مْهَرْتَكْ
بْــــــعَفْطَةْ تَـقْصاحْ مَرْ الوَقْتْ
دَڭْ دڭْ يــــــا مَـــــهْراز الأيَّامْ
كــــــُلْها ؤُفـــينْ دَّاتو الْموجَة
فْ بْــــــحَرْ الْــــحالْ الـمْعَصَّرْ
شــَطْناتْ مَيْلاتْ تَرْزانْ الوْقَرْ
دَڭْ دَڭْ يــــــا مَـــــهْرازْ الأيَّامْ
زْمــــانَكْ مْشى وَبْقاتْ دَڭْتَكْ
نَقْــشَتْ اِتِّساعْ النَّفْسْ الْهايْمَة
ؤُمَــــــنْ حْــبَلْ الصْبَرْ جَدْباتْ
دَڭْ دَڭْ يــــــا مَــــــهْـرازْ الأيَّامْ
طــــــاحْ الْلثامْ وَتْعَرَّاتْ الْكَلْمَة
الــزْواقْ كْثارْ مْدَرْدَرْ بَالضَّحْكَة
مَنْ مَـــهْرازْ الْمَهْرازْ مَهْمازْ تْدَڭْ
دَڭْ دَڭْ يــــــا مَــــــهْـرازْ الأيَّامْ
تْخَلَّــــــطْ الصْفا وَتْعَرَّى الـصَّحْ
الْكٍيَّة مْغَرْڭَة شْــــــواتْ الـرُّوحْ
وَالرْقيبْ العالي جامَعْ الحْسابْ
بقلم محمد حديش
م.ح.ح
07\02\2022
ليست هناك تعليقات:
إرسال تعليق