" معقولة "
كلمات / منصور عياد
معقولة يا إنسان
بتفضل النسيان
يا ريت تجاوبني
أيه فايدة الإدمان
وازاي تكون مرتاح
والعقل منك راح
وف سكة الشيطان
تجني عذاب وجراح
روّق كفايه عكننه
والدنيا سيبك منها
خد لك هدية شمها
تنسى المشاكل كلها
وف لحظة راح مني الصداع
ورجعت يغلبني الضياع
أنا كنت في عز الشباب
والصحة بتقول لى وداع
أغرب حقيقة عشتها
نفسي في يوم دمرتها
واللي هادوني بسمهم
قالوا دا مدمن وانتهى
نِفسى تعود حريتي
م كفايا راحت صحتى
وعيون بحسرة تبص لى
وانا بدارىِ ف دمعتى
الوقتي مش وقت العتاب
غير طريقك والصحاب
بالعزم تقدر تنتصر
وتقول خلاص راح العذاب
دا القرب من ربك مفيد
خلاك قوى خلاك سعيد
إنسان بكامل صحتك
وتعيش حياتك من جديد
ليست هناك تعليقات:
إرسال تعليق