... عشق المحال....
وف عز الليل بنتقابل
ونسافر مع الأحلام
وليل ورا ليل
بنعيش حلاوة الأيام
وتضحكلي سنين عمري
وتهلي بالهوى بدري
وأوصل ليلك مع فجري
تنام الدنيا ولا ننام
وأكتبلك بقلبي جواب
كلام يتغنى بيه الأحباب
عن قلبي إللي فيكي داب
وشايفك أجمل الأحلام
ياعمر العمر وأيامه
ياليل العشق وأحلامه
ياهمس الهوى وسلامه
درويش أنا وداب في غرام
على قلبي إنكتب إسمك
قصاد عيني عايش صورتك
أنام يصحيني غنا حلمك
لا عارفك حقيقه وللا أوهام
سنين بتعدي على بعدك
بأعيشها حياه مع صورتك
وألقي خيالي خدني لدربك
أمشيه وأنا راضي بالأوهام
خدتيني قلتيلي ياخيالي
خدت صورتك في أحضاني
قلتيلي ليه قلبك بيهواني
قلت نصيب والقلوب حكام
وبين الصوره والحلم بألقاكي
أنا عالأرض وإنتي في سماكي
روح بس أنا روحي بتهواكي
جنيه تطل وترميلي سلام
وبين الروح والجسد غيب
ما يعلمه إلا رب الغيب
وإنتي ف عالم عني غريب
ممنوع عنه نبوح ممنوع الكلام
ويفضل خيالك هنا جنبي
وتقولي بعدي عنك مش ذنبي
أنا روح فارقت من زمن بدني
كفايه أزورك ف الليل مع الأحلام
..... أيمن بلال....
ليست هناك تعليقات:
إرسال تعليق