(بالصدفة )كلمات/صبري حسين
ماشي في حالي
سمعت صوت عالي
بصيت يميني وشمالي
شوفت مشهد عجبني
مع اني كنت ماشي
شايل هموم علي كتفي
المشهد استوقفني
وقفت اسمع بكل انتباه
شاب وفتاه
واضح الحب في عيونهم
مرسوم علي كل ملامحهم
البنت بصوت عالي
ارجوك خلاص سبني
ابعد عني
الشاب بصوت كله حنان
ازاي قدرتي تقوليها
انا ابعد عن روحي
ولا أقدر أبعد عنك
ده انت حبيبتي وانا حبيبك
انت نصيبي من كل الدنيا وانا نصيبك
البنت بكل عصبية
لا مش هتضحك علي بكام كلمة
انا زهقت من كل حاجة
ما بقدش باقية علي حاجة
ولا عادت فارقة حاجة
الشاب بكل ود
لكن انت لي كل حاجة
انت الفرح والسعادة
انت اللي خرجيني من أحزاني
معاك بنيت كل امالي
انت يا حبيبتي كل حياتي
انا مش مصدق اللي سمعته
بالتأكيد الكلام طلع غصب عنك
مفيش اي كلمة مقصودة
البنت وقفت مذهولة
الكلام بيطلع منها بصعوبة
العرق غطي وشها
الدمعة نزلت من عينيها
قالت بكل حدة
انت اللي وصلتني لكدة
دايما سايبني لوحدي
لما احتاجك عمري
ما لاقيتك جنبي
لما تيجي تقابلني
بتكون معايا بجسمك
لكن قاعد شارد
قاعدين سوا لكنك
انت في وادي وانا في وادي
انا عايزة احس باهتمامك
عايزة اكون محور افكارك
محتاجة احس بحبك
عارفة اني ساكنة قلبك
لكن محتاجة توصل ده لي
انا اخترتك مابين كل الدنيا
محتاجة عطفك وحنانك
محتاجة احس بقربك
عيون الشاب اتكلمت عنه
بانت فيها كل مشاعره
مد أيده
مسك حبيبته
قالها يا حبيبتي
حبي انت متأكدة منه
عشقي باين في عينيه
انت مش بس حبيبتي
لا انت كل حياتي
معايا في صحوي ومنامي
دايما شاغلة أفكاري
حتي وانت بعيدة عني
شايفك دايما قصادي
ساكنة قلبي وعقلي
بعترف لك يا عمري
اني بحبك اكتر من نفسي
يمكن اكون قليل الكلام
ولا بعرف اوصف الغرام
لكن أنا بعشقك بكل مشاعري
كل افعالي تتكلم عني
ازاي تقولي مش مهتم
ده انت كل اهتماماتي
دايما بفكر ازاي ارضيكي
شغلي الشاغل اني اسعدك
ازاي دايما افرحك
يا حبيبتي بعترف اني مليش في الكلام
ولا بعرف اوصف الشوق والهيام
لكن اقسم لك اني قلبي بك هايم
شغلاني في الصحو والمنام
الحب يا حياتي عمره ما كان كلام
البنت اخيرا ابتسمت
الفرحة علي وشها ظهرت
علامات الرضا بانت
قالت يا حبيبي
ماهو أنت بتعرف تتكلم
انا مش محتاجة اكتر
أنه يكون بنا حوار
نتكلم علشان نقرب الأفكار
يا حبيبي انت عندي غالي
زي ما انا ساكنة قلبك
انت ساكن جوة قلبي
انت فارس احلامي
دايما كنت بشوفك في منامي
كلامي دافعه حبي
انت اغلي ما عندي
بحبك وعلي حبي شاهد ربي
الشاب من فرحته
مقدرش يسيطر علي نفسه
من أيدها شدها
ضمها لصدره
مش عمل حسابه
انهم مش في الشارع لوحدهم
البنت ضحكت من قلبها
اعقل يا مجنون احنا مش وحدنا
فرجت علينا الدنيا
انا واقف بسمع بكل انتباه
الضحكة غصب عني
بصوت عالي طلعت مني
عنيهم جات في عيني
شاورت لهم ب ايدي
ضحكوا وأيد الشاب حضنت ايد البنت
لفرحهم فرحت
اكثر حاجة بسطتني
انهم حكموا قلوبهم
انتصروا لحبهم
قلت في نفسي
يحيا الحب يحيا الحب
الحب اكبر واجمل نعم الرب
صبري حسين
ليست هناك تعليقات:
إرسال تعليق