#فضفض بوح
الظاهر كده كل الأحلام
مليانه جروح
فمتخبيش جواك البعد
فضفض بوح
دا الحضن المغدور بالطعنه
متشعلق ف حلاوة الروح
والقشايه ال بنترجاها ف دنيتنا
بقت طير مدبوح
إجري إتشعبط ف آخر قطر
وف نهاية السطر
بلاش تكتب للقصه نهايه
جُر حبال الود وشد
طَلّْعٓ من قلب البير أحلامك
كل خيارات الفرح أهي ..
مطروحه قدامك
مد خطاويك ولفلفها بخيوط الشمس
دفيها من برد غدرها وقت سكون
إهمس وياها واسألها مانتش مجنون
شهر زاد مسيرها تجاوبك أكيد لو ليله
مسرور سيفه متكسر ، كترت أحزانه
كل ال كان واعده يحبه ..
ف الآخر خانه
برضوا من الآخر مش وحدك ..
ضاعت أحلامه
وفيه كام مليون زيك ، عايش أوهامه
الفجر مش جي لوحده جبهة إنقاذ
دا لازمله عزيمه تكون حاضره ..
ف قلب البرواز
ياللا اجري واتمنى وصالها
قشايتك لو دايبه حبالها ..
هتكون عكاز
عبدالحميد المرسى
ليست هناك تعليقات:
إرسال تعليق