(((ذكريات عبرت افق خيالي)))
//////////////////////////////////////////
بتتذكروا لما اللحم كان
الكيلو يادوبو بعشر اوراق
والقصاب قاعد يكش دبان
ويقلك عندي معلاق
خدو يجزيك الرحمان
ويحلف ويتلف بالطلاق
خسران وهوه خوفان
يخم و عالبيعه خود الأمعاء
/////////////////////////////////////////
والا الخبز بعشرين قرش
خود يا عمي قد ماتريد
حنطه مافيها جنس الغش
والوزن من بعد التبريد
لو تقلب وشك هووه يبش
ت ترضى وتكون سعيد
يقلك يسلملي هالوش
ويرشرشلك كذب ونفاق
/////////////////////////////////////////
وشو احكي ع بياع الغاز
ينققر ع الجره يصيح
الجره بخمسه مافي خواز
مليانه ومزقوقه منيح
ولوتسأل عن سعر الكاز
بيجاوبك قبل ماتزيح
خود مني لوكان معتاز
انا كازي صافي وحراق
/////////////////////////////////////////
نجي لبياع الحلويات
اهلا وسهلا ومرحبتين
متل العندي تلاقي هيهات
المبرومه وام النارين
قرب وجرب رح بتبات
مبسوط وقرير العين
بضاعتي صارت بالحكايات
وما ببيعك الاع دواق
/////////////////////////////////////////
وهيك عشنا ع هالمنوال
والراتب كافي ووافي
ولو بتسألني كيف الحال
بقلك متلي مافي
مافي هموم ولااهوال
مبسوط بسط خرافي
عايش عيشه عال العال
شي تمام وع الرواق
/////////////////////////////////////////
لكن هلق ويلي ياويل
تعا شوفني بتبكي علي
من جوعي مهدود الحيل
ومتخاصم مع بيت المي
ومرعوبه العيله بالليل
م العتمه ماعنا ضي
بنقاسي هموم وويل
في بلدنا الواق الواق
//////////////////////////////////////////
شعر ؛ d.. نذيردهان
ليست هناك تعليقات:
إرسال تعليق