تليق تليق يالفركوس
-----------------------
(زجل مغربي)
الفروج في السروية ناض توكد
بدا يأذن باش الدجاج يقوم
الفلوس قفز كيفدفد
قالو فيقتيني من غرق النوم
الفروج قال ليه تكمش و لبد
انتا ديما تشكي ديما مشؤوم
الفلوس يدق عليه و يتهدد
و تليق للدبيحة يالفيوم
غانتهنا ملي يجي شي حد
دازت ليام جا ضيف معزوم
الفروج شافو هرب و بعد
و دخل للضرك و بقا ملموم
مول الخيمة مالقا ميشد
و بدا يتحلبد للفلوس و يروم
الفلوس مشا للرماد يتمرمد
بغا يتخبا في الحموم
تبعو يجري ليه يطارد
هو يكبضو من القمقوم
قالو غانرفس و نزرد
الفلوس يغوت مليقش يا قوم
الفروج ورا الشوك لابد و جامد
قالو تليق يالفلوس المسموم
تليق تليق في العطرية غاترقد
مع عديسات و سمينة و البصلة و الثوم
تليق تليق انا علك ديما مغدد
كتمرض ملي ناذن ديما تنكر و تلوم
تليق تليق غاتكعور فوق المسمن المكرض
تليق تليق أنا بعدا ارتاحيت و سلكت ليوم
تليق بوك قالك متليقش
بقلم رضوان ضمان
المغرب
ليست هناك تعليقات:
إرسال تعليق