((خط الحياة ))
سواح و غاوي إللف
من مزرعة ل بستان
ب أروي حصايا الأرض
والملك 100فدان
حب و بخصب شوق
مع ناي وكام موال
أحصد نسايم ورد
مع بسمة ساحبة الود
وجمال يفوق الحد
والضحكة ترسم خد
والقلب حن وقال
مال الطريق وإختل
والكف ضرب الكف
وإتبدلت الوان
تاه السبيل مني
للحظ مستني
والبخت والقسمة
تضحك تطمني
مخدوع بضرب الودع
ودموعي ع الخدين
عراف وقال ياجدع
واقف لوحدك ليه
متلومش زمن البدع
وإفتح بقى الكفين
ونشوف خطوط القدر
والقسمة والمكتوب
وقال طريقك خطر
مليان يا ولدي ذنوب
حاسب دا ظلم البشر
مرصوص على الصفين
أوهام تهد الجبل
بمرايا معكوسة
وصبايا شايلة العسل
والصورة منقوصة
خط الحياة فرعين
ولكل فرع إتنين
والجذر كان مسموم
إياك يا ولدي تصاحب
العايبة والملعون
عراف سقاني الظن
واللوم على الأيام
والخوف رواني ب غل
و الشك ف الأحباب
ضرب الودع والكف
دوران و لف ف لف
عقلي إللي جن و خف
راجع وكله أمال
وأدعي لرب غفور
يمكن يروق الحال
يمكن يروق الحال
بقلم //
عماد سيد
ليست هناك تعليقات:
إرسال تعليق