ونات ليل
أنا إبذهني شايل فكر ، بس من أحن أحتكر
ويلاه ضاع العمر ، من ينطق الكلمه
***
بضلوعي أحس السهم ، إمحيّرني حيل النّدم
و گلبي إبعذابه إنجسم ، و أدعي الله اليسلمه
***
ما بيَّ أنظّم شعر ، إملوعني حيل الدّهر
إوياه أنا أريد الستر ، لن محّد ايلزمه
***
النّاس ما تنخرص ، بيهم شريف النّفس
و بيهم غيور و يحس ، و بيهم غريب إسمه
***
دلّوني وين الدّرب ، دنيا و عذاب و حرب
إويه الغايرات أنسحب ، إنغث گلبي شيعلمه
***
شيّبني نور الگمر ، جبراني أعوف إلسفر
إمساهر و أبث النظر ، الدّاعيني شيرهمه
***
إعيوني تصب و تهل ، زاعاني حتّى الأمل
سوّاني مرود كحل ، ايكحّلني حتّى أعمه
***
إتحيّرت صعبت علي ، إبن إمّي ايتسمّى الولي
صحت أنجدوني هلي ، أحس جرحي إمدمّه
***
محد سمع صيحتي ، نار و جمر علّتي
والما حضر عازتي ، ما أفرح إبحلمه
***
الحبّيته شال و رحل ، خاناني حتّى الأمل
وينه سفير الأجل ، ايباريله و ايعلمه
***
إمدوّخني حيل الگلب ، لن يروي قصّة ويحب
ما أرجّع الينسحب ، ما أجد بيه رحمه
***
دولبني طگني الدّهر ، سايب إبجرف النهر
صبري إنجسم و إنفطر ، من هو الذي ايحزمه
***
شيّال حملي وگع ، أبقوّة الخالق ركع
إرشدوني يا هل ربع ، مو جرح و إنلحمه
***
هويه و ضباب و مطر ، و الدّرب نار و خطر
گاطع منامي السهر ، و السهر شيندمه
***
ملّيت من البچي ، صاير ثجيل الحچي
شال اليحن لي و يجي ، و إختاضت البسمه
***
ايواعدني جفني ويرف ، يروي إبطاري الولف
طبع الندامة كلف ، و الزلمه من عزمه
***
إلبس ثياب المحب ، كافي العتب يا گلب
الفراگ ما ينجرع ، بس الله اليردمه
***
بعيوني أشوفن بخت ، الدمعه إبعيني إرتخت
و روحي الذاتي وفت ، وبعمري متنسمه
***
أون و أتنطّر أحبابي وهالاي
الدّمع بعيوني عاش أبتر وهالاي
السعاده إنباگت إبطوري وهالاي
سلبهه الچان حافر گبر أخيّه
***
جاسم محمد الحسّاني 15/04/2025
ليست هناك تعليقات:
إرسال تعليق