زجل
~~
الرْحَى
~~~
طَحْني يا الرْحى وْدوري
مْــــــزِّينْ طْــــــحينَك مْـعَشَّقْ اْلڭَلْبْ
اللهْ عْــــــلى يَّـــــامَكْ بْــيَدِّينْ لْمِّيمَة
دَوْراتَــــــكْ تْـــــطَحْني حْنينَة وَزْرَعْ
تْــــــوَحَّشْتْ حَــسْ نَغْماتَكْ مَڭْواني
طَحْني يا الرْحى وْدوري
عْــــــلى حْــــــروفْ حْــجارَكْ تْنَيْلي
بْــــــجَهْدْ يَــــدِّينْ المِّيمَة الْمْشَقْقينْ
قَــــــوْسو ضْــــــهَرْها الْــمَكْفي عْمَرْ
وَخَّــــــا شَـــــطْنَتْ الْــــوَقْتْ الْقاني
طَحْني يا الرْحى وْدوري
طــــــاحُونَةْ رْحــــــاكْ جَــدْرْ مْوَرَّثْ
جــــــيلْ الْــــــجيلْ حَـــــتَّى رَكْنوكْ
حَــــــطُّوكْ فْ مَــــــتْحَفْ الـــشُّوفْ
تَــــــاريخْ حْـــــداڭْتَكْ عَـزْ مَرْشاني
طَحْني يا الرْحى وْدوري
حْــــــجَرْتَكْ الْـحَرْشَة دَوْراتْ الْخيرْ
أنْــــــتِ وْالــــــزْمانْ تْــوامْ الطْحينْ
شَـــــلَّا مْــــــطامَرْ نَـــيْلاتْ حْجارَكْ
شَـــــلَّا دْڭــــيڭْ شَبْعاتَكْ عالْجاتْني
طَحْني يا الرْحى وْدوري
عْــــــلى دَوْراتْ ســانْياتْ السْواقي
مْــــــنَغْمَة بَـــــڭْليسَةْ أَتايْها يْشالي
فْ لَــــــمَّةْ دْڭـــيڭْ الْحْبابْ مْلاوي
مْــــــنَسْمَة سْـــمَنْ وَعْسلْ حَسَّاني
طَحْني يا الرْحى وْدوري
دِيَّــــــكْ مَـــنْ هْلالْ الْفْجَرْ يَطْحَنْ
حْــــــتَّى الْـعَشْوِيَة وَرْحاكْ يْمَعَّشْ
بِـــــكْ ضَــرْباتْ أمْتالْ رَمْز الْفَلَّاحْ
نْــــــقَشْها حَــرْفْ حْجارَكْ سْواني
طَحْني يا الرْحى وْدوري
عْــــــلى ريـــــحْتْ زْمانْ حَرْكاتك
تْــــــحَلْقاتْ حْـــــداكْ شَلَّا قَصَّاتْ
تـْـــــعاوَدْ لَـــــحْفايَدْ فْ عَڭْبِياتَكْ
كْــــــتَبْها عَــــــزْ مْـطامْرَكْ مْعاني
طَحْني يا الرْحى وْدُوري
عَــــــزَّكْ قَـنْديلْ مَنْقوشْ رَشْماتْ
فْ ضُــــــو الڭــــمرة يَـــبْرَڭْ بْهاكْ
زَمَّــــمْها فْـداوي الــدَّوَّارْ حَجَّياتْ
تْــدَوْناتْ بَرْسامَكْ قْصايَدْ غَنَّاتْني
بقلم✍️ذ.محمد حديش
~~~~~~~~~~~~~
13\06\2025
شرح بعض الكلمات:
مَڭْواني أي ما أقواني
تْنَيْلي أي تتقني
القاني أي المقتنص
حْداڭْتَكْ أي حداقتك
مَرْشاني أي سمعة عالية
مْطامَرْ أي خزائن أرضية للحبوب
ملاوي أي فطائر
دِيَّكْ أي صوتك
حْداكْ أي قربك
عَڭْبِياتَكْ أي شاي العصرية
زمَّمْها فْداوي أي كتبها الحكواتي
بقلم ذ.محمد حديش
ليست هناك تعليقات:
إرسال تعليق