قولوا لعين الشمس
قولوا لعين الشمس ما تحماشى
عشان طابور جنازاتنا صابح ماشى
شاربين مرار الدنيا فى الرضعه..
نجمع فواكه ..بس ماندوقهاشى
وسع تعالى على جنب..واستنى
ده طابور عرايس رايح الجنه..
من غير زفاف ولا شبكه ولا حنه
أغلى الشباب مالحقش يتهنى..
....... ........
قولوا لعين الشمس أه يانا..
الموت بخبثه جه على خوانا
فاكرين بأن العمر قدامنا...
والموت فاجأنا فى دنيا كارهانا
سرقوا فلوس الكوبرى والسكه
والعمر كان مستنى على تكه..
من صغرنا وضهورنا محنيه..
بيمصمصوا دمنا..وبجنيهات فكه
...... .......
قولوا لعين الشمس ينفع كده ؟؟؟
إهمال ياخد عمرنا بالشكل ده؟؟
أحنا بشر..مش قش وكناسه..
الفقر خد عمرنا.. كرامتنا منداسه
عايشين حياتكوا بمنتهى الافترا..
ومقضينها سكر ونجاسه...
وأحنا بيوتنا ع الكفاف عايشه
عشان تدبر عشاها بتبقى محتاسه
........ ......
الثوره قامت زمان لجل الفقير يتنصف
دارت بينا الايام واهو الفقير اتنسف
وبكل فجر الباشا يسرقنا...
يسرق شقا الغلبان ولا بيتكسف..
قولوا لعين الشمس تحمى كمان
ارواحنا راحت ماعدش لينا مكان
ندعى عليكوا فى كل وقت وأدان
يقصف كمان عمركم الواحد الديان.
...............
بقلم/نصر سيد بدر طلحه القاهره
@إشارة
ليست هناك تعليقات:
إرسال تعليق