قصيدتى الشتا جالنا
الشتا جالنا لابس جلابيه صوف
وشايل على كتفه شال عريض
لابس فى ايده جوانتى وتربروف
ووشه مدارى ورا الزعبوووط
جايب معاه السقعه ف قرطاس
ح يُفركها ويوزعها على الناس
والبطاطين تصحى م الكياس
والليل يطول عليها يبقا مفرود
الشتا جالنا وعامل نفسه خواجه
ورافع على زعبوطه كمان مظله
الوانها غريبه ملخبطه وآخر الآجه
وضحكتة مكرمشه والمطره نازله
بتعزف لحن جميل يعطى إحساس
العصافير بتدفى ف حضن الأشجار
والحمام زغاليله ف حضن جناحاته
وزرع الغيطان بيبلبط تحت الامطار
وخيال المأته مش قادر يفرد دراعاته
والايد شغاله على المحراث والفاس
وفصل الشتا يا مكتر نواته وحكاياته
الشتا فصل المشاعر وقبل الربيع
والليالى الطويله ودفا البطاطين
والدفايه ف السقعه عزفها بديع
والبطاطا والبليله تدفى البطون
وطعم البرتقال والليمون اناناس
وشمس الشموس تفتح النفس لأكلاته
الايام بتجرى وبتتقلب الفصول
وكل فصل له زرع فى البساتين
وكل زرعه من الأرض طعمها جميل
حتى لو الحبوب اتبدرت ف الطين
وأى فصل له نهايه ولو طالت صفحاته
د/ حسن الشوان / مصر
ليست هناك تعليقات:
إرسال تعليق